الخدامه

مريم هزت راسها. ماقدرتش أخبي أكتر من كده يا خالتي. أنا تعبت، وكل يوم بنسكت عشان خايفين على أكل عيشنا. أمينة بصّت ناحية الباب، واتأكدت إنه مقفول كويس، وبعدها قربت منها. طيب اسمعيني كويس... بكرة لو الشيخ سألك عن أي حاجة، احكي اللي حصل معاكي إنتِ بس. ماتدخليش في موضوع مش متأكدة منه.

مريم استغربت كلامها. ليه؟ إنتِ تعرفي حاجة أنا ماعرفهاش؟ أمينة اترددت، وبعدها قالت من شهرين، كان فيه محاسب شغال هنا. راجل محترم، وعمره ما اتكلم على حد. فجأة اتقال إنه سرق أوراق من القصر، واتطرد من غير ما حد يسمع دفاعه. مريم فتحت عينيها بدهشة. طب والشيخ راشد كان عارف؟ دي المشكلة يا بنتي... محدش عارف الشيخ وصله إيه من الحقيقة، ومين اللي وصّله الكلام.

أمينة سكتت لحظة، وبعدها كملت لكن المحاسب قبل ما يمشي، قال لي جملة عمري ما نسيتها لو حصل لي حاجة، دوروا على الدفتر الأزرق. مريم قامت من مكانها. دفتر أزرق؟ دفتر إيه ده؟ أمينة هزت راسها. ماعرفش. بس من يومها، وأنا حاسة إن فيه حد في القصر بيخبي حاجة كبيرة. وقبل ما مريم تسأل سؤال تاني، سمعوا صوت خطوات بتقرب من الباب. أمينة وشها اتغير، وهمست أوعي تقولي لحد إني حكيتلك الكلام ده!

وبسرعة خرجت من باب جانبي صغير بيوصل للممر الخلفي. مريم رجعت سر,,ـــــيرها، لكن النوم طار من عينيها تمامًا. دلوقتي بقى عندها سؤال أكبر من موضوع نومها على سر,,ـــــير الشيخ إيه حكاية الدفتر الأزرق، وإيه اللي حصل للمحاسب اللي اتطرد من القصر؟ الساعة تسعة الصبح بالضبط، كان الشيخ راشد قاعد في مكتبه، وقدامه عم جابر ومريم. وبعد دقايق، دخل فهد وهو شايل ملف أسود. سلّم على عمه، وقعد في هدوء.

الشيخ راشد بص للجميع وقال أنا طلبت الاجتماع ده عشان أعرف حقيقة اللي بيحصل في القصر. ومش هقبل إن أي حد يكدب عليّا، مهما كان منصبه أو قربه مني. وبعدين وجّه كلامه لعم جابر عايز كشف المرتبات والخصومات لآخر ست شهور. عم جابر اتجمد مكانه للحظة، لكنه حاول يخفي ارتباكه. حاضر يا فندم، هجيبه لحضرتك فورًا. فهد اتدخل بهدوء مش محتاج يا عمي. أنا جبت نسخة من الكشف الموجود في الإدارة.

فتح الملف، وحط الأوراق قدام الشيخ. راشد بدأ يراجع الأرقام، وكل ما يقلب صفحة، ملامحه كانت بتتغير أكتر. لحد ما وصل لصفحة معينة، وقف عندها وسأل مين المسؤول عن اعتماد الخصومات دي؟ عم جابر رد بسرعة الإدارة يا فندم، حسب التقارير اللي بتوصلني. فهد بص له وقال غريبة! لأن فيه خصومات اتعملت على موظفين ماكانوش موجودين في القصر أصلًا وقت المخالفات المسجلة عليهم.

عم جابر اتلخبط. يمكن حصل خطأ في التسجيل! الشيخ راشد قفل الملف بقوة وقال ست شهور أخطاء؟ وكل الأخطاء دي في حسابات العاملين الضعاف بس؟ محدش رد. وفجأة، مريم رفعت إيدها بتردد. يا فندم، ممكن أقول حاجة؟ الشيخ أشار لها إنها تتكلم. قالت بصوت هادي أنا مش فاهمة في الحسابات، بس فيه حاجة شوفتها من يومين.