حكايات نرمين همام

بصت في الورق بسرعة، وبعدها رفعت راسها وقالت بثقة مصطنعة: — دي أمور تخص الشركة، وإنت كنت مسافر، وأنا تصرفت بصفتي المسؤولة عن مصالحك لفيت وشي ناحية المحامي وقلت بلهجة حاسمة: — اتفضل يا أستاذ، الاجتماع انتهى. وأي ورق يخص الشركة مش هيتناقش من غير ما أكون موجود. لم المحامي أوراقه وخرج بسرعة، وسابنا لوحدنا. قربت من المكتب وبصيت لأمي مباشرة.

— اتسحب 15 مليون جنيه من حسابات الشركة، واتحولوا لحسابات مجهولة باستخدام تفويض عليه إمضتي. وأنا ما مضيتش على أي تفويض من ده. عايز أعرف الفلوس راحت فين. وشها اتغير، لكنها سرعان ما رفعت صوتها. — أنا أمك يا طارق! والفلوس دي في الآخر فلوسك، يعني أنا ما سرقتكش! ضحكت بمرارة وقلت: — كونك أمي مش معناه إن من حقك تتصرفي في فلوسي من غير علمي، ولا إنك تزوري إمضتي وتفتكري إن الموضوع هيعدي عادي.

قعدت على الكرسي اللي قدامها، وفضلت باصصلها وأنا مستني رد واضح. لكنها لفت وشها وقالت: — أنا كنت بحميك من أهل مراتك. الناس دي عينها على فلوسك، وأنا سبقتهم وأمنت مستقبلنا. خبطت بإيدي على المكتب. — كفاية كدب! بدل ما تتهمي الناس، جاوبيني على سؤال واحد: الفلوس راحت فين؟ ما ردتش. طلعت تليفوني وشغلت التسجيل الصوتي اللي حصلت عليه من كاميرات المراقبة في الفيلا.

كان صوتها واضح وهي بتتكلم مع واحدة من صاحباتها: — لازم نكسر شوكتها هي وأهلها الأول. لما يارا تحس إنها مكسورة ومستضعفة، طارق بنفسه هيرميها بره، وساعتها كل الملايين دي هترجع في جيبنا تاني. أول ما التسجيل خلص، بصيت لأمي. وشها كان اتخطف، وإيديها اتشبكت في بعض وهي بتحاول تلاقي أي مبرر. قلت بصوت هادي، لكن كل كلمة فيه كانت تقيلة: — يعني الموضوع مش مجرد إنك مش طايقة أهل مراتي.

إنتِ كنتِ بتخططي تخرّبي بيتي، وبتستخدمي اسمي عشان تسحبي فلوس الشركة! ما نطقتش. وقفت، وعدلت هدومي، وقلت: — من اللحظة دي، كل صلاحياتك المالية والإدارية في الشركة انتهت. كل التحويلات هتتراجع، والتفويضات هتتفحص، وأي حد شارك في الموضوع هيتحاسب. صرخت في وشي: — إنت بتهدد أمك يا طارق؟

! رديت من غير ما أعلي صوتي: — لأ، أنا بحمي عيلتي وبصون بيتي، وبحافظ على حقي وحق الناس اللي ائتمنتني على شغلها. في نفس اللحظة، دخل أفراد أمن الشركة ومعاهم القرار الرسمي بإيقاف صلاحياتها، بعد ما طلبت من الإدارة القانونية اتخاذ الإجراءات اللازمة لحين انتهاء المراجعة.